Yjet e muzikës u mblodhën për iHeart Music Awards në Inglewood të Californi-së, ku çmimin e këngës më të mirë të vitit e rrëmbeu Justin Timberlake me “Can’t Stop The Feeling”.

Podiumin, këngëtari e përdori megjithatë jo vetëm për falenderime, por edhe për t’i përcjellë një mesazh të rinjve të identifikuar si të ndryshëm nga të tjerët.

Advertisement

“Dua të përfitoj nga rasti e t’i drejtohem të rinjve tani, sepse ka shumë të tillë që po më shohin në këtë moment. Nëse jeni me ngjyrë, nëse jeni gay, lezbike, trans, apo ju quajnë qullacë këngëtare nga Tennessee, ta dini se çdo person që tallet e ju trajton me egërsi e bën këtë vetëm sepse ka frikë ose sepse e kanë mësuar të ketë frikë nga fakti që ju jeni të rëndësishëm”, tha Timberlake.

Spektaklin e çeli Katy Perry me këngën e saj “Chained to the Rhythm”, shoqëruar nga një grup fëmijësh kërcimtarë. Big Sean i dha energji shfaqjes me hitin e tij “Bounce Back” pak përpara se Chainsmokers të merrnin çmimin e artistëve të rinj më të mirë. As Coldplay nuk dolën duarbosh nga ceremonia ku u nderuan me çmimin e turneut më të mirë, ndërsa Bruno Mars mori trofeun e inovatorit të vitit.