Tuesday, June 27, 2017

Kinema

“Mbreti Artur” dështoi

“King Arthur” mund të quhet pa frikë dështimi kinematografik i kësaj vere, duke zhgënjyer audiencën në mbarë botën.

Ndonëse është prodhim që mban firmën e regjisorit të njohur, Guy Ritchie, një investim nga shtëpia e famshme “Warner Bross” me protagonistë yje të “Hollywood”-it, sërish nuk ka mundur të renditet në radhët e sukseseve të këtij viti.

Gjatë premierës në SHBA, “King Arthur – The legend of the Sword” nuk mundi të mblidhte as 14 milionë dollarë në “Box Office”.

Kritikët analizojnë një sërë faktorësh, që e çuan Guy Ritchie në dështim. Së pari, ata thonë se historia e Mbretit Artur është thënë e stërthënë në forma të ndryshme, ndaj kurioziteti në radhët e publikut nuk ishte i lartë.

Për regjisorin Guy Ritchie, kjo nuk është hera e parë që merr histori të njohura, si në rastin e “Sherlok Holmes”, por ajo që duket se e ka penalizuar këtë herë është koha që i është dashur për të prodhuar filmin.

Fillimisht ai njoftoi për publikun se kishte nënshkruar kontratën për këtë film në vitin 2014, ndërsa mesi i 2017-s ishte koha kur pa dritë filmi, pra 3 vite më vonë, një faktor në disfavor të filmit, pasi pritja duket ta ketë lodhur audiencën.

Analistët mendojnë se edhe përzgjedhja e aktorit protagonist i ka dhënë një goditje kundër këtij filmi. Charlie Hunnam është ende një yll i paeksploruar, ndaj besimi i dhënë për staturën e Mbretit Artur tejkalon kapacitet e tij interpretuese.

Arturi bën një jetë të vështirë në një lagje periferike, duke u stërvitur në kushte të vështira në luginën pranë qytetit. Por sapo ai tërheq shpatën nga shkëmbi, është i detyruar të pranojë trashëgiminë e tij të vërtetë: i pëlqen apo jo ky fakt.

Është ky subjekti i filmit, i cili aktualisht po shfaqet në kinematë shqiptare me lojën e aktorëve Charlie Hunnam, Jude Law, Eric Bana.

“Aksidentalisht” në Kanë

T. J. Miller, ylli i filmit “Emoji”, pa dashje i bëri një publicitet edhe më të madh produksionit të shumëpritur në nisje të Festivalit të 70 të Kanës. Si pjesë e promovimit, Miller u ul me parashutë mbi një varkë, por pak sekonda më vonë humbi ekuilibrin dhe ra brenda në ujë. Sigurisht që një nga emrat më të famshëm të humorit në SHBA nuk mund ta kalonte veçse me humor gafën e tij, duke pretenduar se e bëri me dashje. Filmi “Emoji”, i vendosur në botën e “Textopolis”, tregon historinë e një “emoji”, zëri i të cilit është i Miller dhe që lufton për të qenë normal.

“Filmi është një mënyrë e mirë që fëmijët të rrinë urtë. Por është për të gjithë. Prindërit dhe fëmijët përdorin ‘emoji’ në mesazhet e tyre dhe kjo është një gjuhë ndërkombëtare”, tha T. J. Miller, aktor.

Pjesë e filmit janë emra të tjerë të njohur, si Ana Faris dhe Sofia Vergara, por edhe aktori i famshëm britanik, Patrick Stewart, i cili duhet thënë se ka qenë i pafat, pasi zëri i tij është ai i “emojit” të jashtëqitjes.

Filmi “Emoji” nuk do të transmetohet gjatë Festivalit të Kanës, që të mërkurën nis edicionin e tij të 70. Ky është festivali më i rëndësishëm i filmit në botë dhe në këtë edicion do të paraqiten 50 filma nga 30 vende të botës. 19 prej tyre pretendojnë të fitojnë çmimin kryesor të “Palmës së Artë”, ndërsa në tapetin e kuq do të zbresin yje të “Hollywood”-it, si Nicole Kidman, Marion Cotillard, Kristen Stewart, Joaquin Phoenix, apo Jake Gyllenhaal.

Aniston: Pse “Friends” nuk mund të ribashkohen

Jennifer Aniston është pyetur gjithmonë për një ribashkim të Friends. Por këtë herë ka çuditur me përgjigjen e saj, duke thënë se seriali nuk do të funksiononte në ditët e sotme.

“Ne bëjmë shaka duke thënë se nëse “Friends” do të ishte krijuar sot do të kishim një lokal plot me njerëz që thjesht ndezin iPhone-at. Nuk do të kishte episode aktuale apo biseda”, thotë ajo për Huffington Post.

Aktorja 48-vjeçare thotë se njerëzit sot zhyten në telefona për të bërë biseda. Jenn pranon se ndonjëherë teknologjia e mposht dhe e privon nga gjumi. “Nëse mendoj për pajisjet e mëparshme, po përpiqem të mendoj fillimisht, kush vjen e para, zakoni im i keq i gjumit, apo një pajisje? Ndershmërisht dua të fle shëndetshëm dhe nuk besoj se kjo i atribuohet këtyre telefonave që erdhën në jetën tonë dhe në të vërtetë filluan të na prishin gjumin”, vijon Aniston.

“Guardian of Galaxy Vol. 2”, boom të ardhurash në kinematë amerikane

Debutim bum për filmin “Guardian of Galaxy Vol. 2”, që mblodhi në fundjavën e parë në kinematë e Shteteve të Bashkuara të Amerikës 145 milionë dollarë.

Këtë vit vetëm “E bukura dhe bisha”, mblodhi më shumë të ardhura, 174 milionë në një fundjavë. Episodi i dytë i sagës , së drejtuar nga James Gunn, ka mbledhur më shumë të ardhura sesa episodi i parë në 2014, që arriti 94 milionë dollarë.

Shumë në distancë dy filmat e tjerë “Fast & Furious 8” mblodhi 8,5 milionë, me një total prej 207 milionë, ndërsa “Baby Boss” mblodhi 6,2 milionë dollarë, për një total prej 156 milionë.

Filmi “‘Guardian of Galaxy Vol. 2,” ka në qendër një grup heronjsh dhe alienë të çuditshëm , që përfshihen në një aventurë të re për të zbuluar identitetin e babait të Peter Quill/Star-Lord (i interpretuar nga Chris Pratt).

Historia ndjek evolucionin individual të secilit komponent dhe procesin e konsolidimit si grup dhe familje, të cilit i shtohen karaktere të reja.Ndër aktorët që interpretojnë janë edhe Michael Rooker në rolin e Yondu, Karen Gillan në atë të Nebula, ndërsa Sean Gunn kthehet të interpretojë Kraglin. Kasti përfshin edhe Pom Klementieff, Elizabeth Debicki, Chris Sullivan dhe Kurt Russell në rolin e Ego, babai i Peter Quill.

“MTV Movie & TV Awards”

Në përpjekje për t’i dhënë një shkëndijë të re shfaqjes së tij të çmimeve, MTV-ja e ktheu mbrëmjen e së dielës “MTV Movie Awards” në “MTV Movie & TV Awards”.

Përpos ndarjes së çmimeve tradicionale të telvizionit, rrjeti hoqi dorë nga ideja e “aktorit dhe aktores më të mirë”, duke vendosur që tani kategoria e interpretuesit që ka lënë më shumë mbresë të jetë neutrale sa i takon gjinisë.

Ndërsa ajo “e luftës më të mirë” është kthyer në “lufta më e mirë kundër sistemit”. Mikpritësi i ceremonisë, Adam Devine tha se MTV është mjaft krenare për ndryshimet e saj progresiste.

“Duhet ta keni vënë re, besoj, se nata e sotme nuk ka të bëjë thjesht me argëtimin. Ajo është gjithashtu një moment për të rrëzuar barriera e për të përhapur ndërgjegjësimin mbi çështje të ngutshme të kohës”, tha Adam Devine, prezantues.

Skenën e spektaklit e pushtoi në thelb diversiteti dhe përfshirja. Emma Watson ishte fituesja e çmimit të madh për rolin e Bellës tek ekranizimi i animuar i “Disney”-t nga vitit 1991, “E bukura dhe bisha”.

“Aktrimi ka të bëjë me aftësinë për t’u vënë në vendin e dikujt tjetër dhe nuk ka përse ndahet domosdoshmërisht në dy kategori të ndryshme”, tha aktorja.

“E bukura dhe bisha” mori edhe çmimin e “filmit më të mirë” dhe për këtë, regjisori Bill Condon falënderoi publikun femëror. E vlerësuar doli nga mbrëmja edhe 13-vjeçarja Millie Bobby Brown, e cila ka mahnitur me interpretimin e saj në “Stranger Things”.

“MTV Movie and TV Awards” nisi si çdo shfaqje tjetër në Los Angeles, me yjet e veshur lehtë, si për mot të ngrohtë dhe, ndonëse organizatorët ishin paralajmëruar mbi mundësinë e një shiu të lehtë, breshëri i fortë që parapriu ceremoninë i gjeti krejtësisht të papërgatitur.

Trump, “personazh” filmi?

Pyetja më e madhe që lidhet me serialin e famshëm amerikan “House of Cards” lidhet ngushtë me faktin sesi do t’i përgjigjet ky serial në sezonin e pestë të tij, fitores së Donald Trump.

Katër sezonet e para imagjinonin se çdo të ndodhte nëse politikanët më përllogaritës, të pamëshirshëm e imoralë, do të liheshin të lirë të vepronin brenda sistemit politik të Amerikës.

Kishte tradhti, kishte thika pas shpine, shantazhe e deri edhe vrasje, por ende Presidenca e Trumpit ishte më surreale se çdo gjë tjetër, madje edhe më surreale sesa vet imagjinata e Frank Underwood.

Që pas fitores së Trumpit mes republikanëve, seritë e reja ende nuk kanë nisur transmetimet, por si do ta reflektojnë ato në vijim këtë çmenduri të amerikanëve?

Përgjigjja, nëse traileri i sapodalë është në njëfarë mënyre një tregues, do të ishte ajo e kthimit të Kevin Spacey dhe personazhit të tij Frank Underwood në versionin demokratik të Trumpit.

Fundi i sezonit të katërt e gjeti Underwood në mes të një fushate të nxehtë për presidencialet, pikërisht aty ku mendohet të nisë edhe sezoni i pestë i tij.

Ashtu siç “Trump asnjëherë” u bë një thirrje për ata që e kundërshtojnë idenë e një ylli të një “reality shoë”, që tenton Shtëpinë e Bardhë, po kështu edhe ata që janë kundër Underwood do të jenë të lumtur me cilindo kandidat, mjafton që të mos ketë bërë hile në rrugën drejt presidencës.

Traileri shfaq gjithashtu një monolog të Underwood, ku ai flet mbi mënyrën sesi amerikanët mund të mësojnë të mirën nga e keqja, duke u thënë atyre sesi të mendojnë, ndiejnë dhe të duan.

“Ata janë me fat që më kanë mua”, thotë Underwood në një mënyrë gati-gati maniake, duke sjellë në vëmendje fjalimin e Trump gjatë fushatës së tij, ku e cilësoi veten si të vetmin njeri që mund ta shpëtonte Amerikën nga shkatërrimi.

E ashtu si Trump, edhe Underwood është një humbës i madh në garën e tij përkundrejt republikanit Will Conway. Në trailer dëgjohet një e shtënë gjatë mbrëmjes së zgjedhjeve, kur Underwood ka mbledhur 255 vota, ndërsa Conway 245, shoqëruar me një vështrim mosbesues në fytyrën e tij, gjë që të kujton ngjarjet e nëntorit të vitit të kaluar.

“Underwood. 2016. 2020. 2024. 2028. 2032. 2036”, përfundon ai. “Një komb: Underwood”. Sezoni i pestë i “House of Cards” do të nisë transmetimet më 30 maj.

Me të atin aksion, me të birin puthje

Me të atin u shfaq në ekran në një film plot aksion e fantazi, ndërsa me të birin rikthehet më “njerëzore” dhe shkëmben me të puthje pasionante nga sheshxhirimi. Will Smith ndoshta mund të mos i pëlqejë imazhet e shkrepura nga xhirimet e filmit “Life in a year”, ku protagonist është i biri i tij, Jaden Smith dhe modelja e shndërruar në aktore të suksesshme, Cara Delevingne. Me Will Smith, Cara bashkëpunoi në filmin “Suicide Squad”, ku luan rolin e një magjistareje të fuqishme.

“Unforgettable”, aktorja kryesore “harron” premierën

Të ftuarit dhe gazetarët e pranishëm në premierën e “Unforgettable” nisën të pyesnin veten nëse Rosario Dawson e kishte harruar eventin, kur aktorja kryesore e filmit u pa të mbërrinte vetëm pasi kishte nisur shfaqja e tij. E veshur me një fustan bust ngjyrë floriri, 37-vjeçarja pozoi për fotografët e dha intervista, edhe pse të gjithë aktorët e tjerë dhe regjisori kishin hyrë ndërkohë në sallë.

Dawson interpreton Julian, një grua e re, jeta e së cilës trazohet nga ish-bashkëshortja e të fejuarit të saj, Tessa, roli i së cilës i është besuar aktores Katherine Heigl.

Në rrjedhën e filmit shihet sesi Tessa bëhet gjithmonë e më e fiksuar pas idesë së hakmarrjes. Julia mendonte se kishte gjetur njeriun e ëndrrave të saj, por rivalja do t’ia kthejë jetën në ferr.

“Ajo që më pëlqen te ky film është fakti se, sheh gra krejtësisht të ndryshme nga njëra-tjetra që luftojnë me të njëjtën ide: të ngulet perfeksionizmi. I shikon sesa të forta janë dhe se çfarë ekipi dinamik do të krijonin po të ishin bashkë, por ndërkohë ato gjenden në një konkurrim të ashpër me njëra-tjetrën”, tha Rosario Dawson, aktore.

Kasti i aktorëve përbëhet më së shumti nga femra. Edhe regjisorja është grua, Denise di Novi. Në kinematë amerikane, filmi do të nisë të shfaqet duke filluar nga data 21 prill.

Festivali i 70-të i Kanës në shifra

Ja disa të dhëna në gjuhën e shifrave mbi përzgjedhjen zyrtare të Festivalit të Kanës 2017, që do të zhvillohet nga data 17 deri në 28 maj:

  • 49 filma me metrazh të gjatë nga 29 vende kanë mbërritur deri këtu në përzgjedhjen zyrtare nga 1 930 të propozuara në festivalin më të madh botëror të filmit, përfshirë vepra të prezantuara jashtë gare, si midnight movie apo filma të veçantë. Në vitin 2016 numri i filmave që kishin aplikuar ishte 1.869.
  • Nga numri i përgjithshëm, 18 filma me metrazh të gjatë janë në garë dhe 16 në garën më të ngushtë.
  • Ndër regjisorët në garë për Palmën e Artë, vetëm austriaku Michael Haneke zotëron tashmë meritën më të spikatur, si dhe atë të fituar në dy kompeticione radhazi, për “Shiriti i Bardhë” në 2009 dhe “Dashuri” në 2012.
  • Nga 18 filmat në garë për Palmën e Artë, katër mbajnë vulën e regjisorëve francezë, katër amerikanë, dy koreanë, një hungarez, një britanik, një austriak, një rus, një ukrainas, një grek, një gjerman dhe një japonez.
  • Tre regjisorë janë në garë për Palmën e Artë, numër i njëjtë si vitin e kaluar. Amerikania Sofia Coppola, japonezja Naomi Kawase dhe britanikja Lynne Ramsay.
  • Përzgjedhja numëron 9 filma premierë kundrejt 7 vitin e kaluar dhe 8 dy vite më parë.

Rikthehet “Fast and Furious”

Ndjekje me makina me shpejtësi të lartë, dublantë të guximshëm dhe shpërthime, kthehen në ekranin e madh në episodin e tetë të serisë së filmave Fast and Furious.

“The Fate of the Furious”, Fati i të tërbuarve, risjell karakterin kryesor, Dominic Toretto, të luajtur nga Vin Diesel, që tani është i jashtëligjshëm.

Fituesja e çmimit Oscar, Charlize Theron, i bashkohet kastit si një karakter negativ, po ashtu, Sipher dhe Dayne The Rock Johnson, rikthehen në kast. Në film, shfaqen po ashtu edhe personazhet e zakonshme, Turese Gibson, Kris Ludakris Bridges dhe Michelle Rodriguez.

Ky është filmi i parë i serisë që pas vdekjes së aktorit Pol Uolker dhe Rodrigez thotë se xhirimet nuk ishin aspak të lehta, pa të.

“Kjo është edhe një nga motivet pse ne jemi më të errët këtë radhë. Sepse nuk mund të kthehesh në biznes si zakonisht pas një tragjedie të tillë. Ju mund ta shikoni këtë film dhe do ta ndjeni se është më i errët se secili prej filmave që kemi bërë më parë”, thotë Michelle Rodriguez.

Jason Statham, që rikthehet në filmin aksion, përshkroi tapetin e kuq ne Nju Jork, me partneren e tij shtatzënë, modelen dhe aktoren, Rosie Huntington-Whiteley.

“Fate of the Furious” do të dalë në kinematë amerikane, më 14 prill.

Advertisement
Advertisement

EDITOR PICKS