Friday, July 14, 2017

Latest

Shqipëria në zonën e vendeve që importojnë vdekje nga ndotja

Vendet e pasura eksportojnë ndotjen e ajrit, e cila është e lidhur me vdekshmërinë, ndërsa importojnë mallra, shkruan ‘The Economist’…

Rajoni i Europës Lindore, ku përfshihet edhe Shqipëria, ka numrin më të lartë të vdekjeve të importuara. Rajoni ka një shifër rekord prej 241 vdekjesh të importuara për një milion banorë.

Çfarë janë vdekjet e importuara? Një e treta e vdekjeve që shkaktohen nga ndotja ndodhin për shkak të transportimit të grimcave nga vendi në vend me anë të erës.

Nga studimi i fundit rezulton se dy herë më shumë janë të shkaktuara nga mallrat dhe shërbimet që janë prodhuar në një rajon të varfër dhe eksportohen për konsum në një vend shpesh më të pasur dhe me standarde më të larta, raporton Monitor.

Në fakt, vendet e pasura po eksportojnë ndotjen e ajrit dhe vdekjet e lidhura me to, duke importuar mallra.

Sikurse Europa Lindore është rajoni që shkakton më shumë vdekje me anë të ndotjes që përcjell në rajonet e tjera, Europa Perëndimore ka numrin më të lartë të vdekjeve të shkaktuara nga ndotja e vendeve të tjera, duke numëruar 319 vdekje për një milion banorë (shiko hartën).

Rajoni i dytë, i cili eksporton më shumë vdekje me shkak ndotjen është Australia me 311 vdekje më 1 milion banorë.

Qeveritë ankohet për trafikun dhe shqetësimet e tjera lokale që ndotin ajrin. Por hulumtimet e sapopublikuara nga Zhang Qiang, nga Universiteti Tsinghua në Pekin dhe një ekip ndërkombëtar, ku përfshihen ekonomistët e mjedisit, fizikanët dhe ekspertë të sëmundjeve, tregojnë se problemi ka gjithashtu një dimension global. Analiza e dr. Zhang vlerëson se në vitin 2007 – viti i parë për të cilin ishin të disponueshme të dhëna të plota industriale, epidemiologjike dhe të tregtisë kur skuadra filloi punën – më shumë se 3 milionë vdekje të parakohshme në të gjithë botën u shkaktuan nga emetimet e grimcave (të njohura si PM2.5 , sepse grimcat në fjalë janë më pak se 2.5 mikronë).

Roma vendos rregulla të forta, ja çfarë nuk mund të bëni më në kryeqytetin italian

Roma është një prej vendeve më të preferuara të turistëve të cilët vendosin të vizitojnë Italinë. Sigurisht gjëja e parë që mund të vizitosh nga Roma janë shatërvanët në qendër të qytetit. Por për të ruajtur këto bukuri të këtij qyteti, kryebashkiakja Virginia Raggi ka ndaluar konsumin e ushqimeve apo pijeve pranë këtyre shatërvanëve. Cilido që konsumon ushqim apo pije pranë shatërvanëve të famshëm dhe nëse dikush kapet do të paguajë një gjobë prej 240 eurosh. Raggi shkroi në një postim në Facebook se bukuria e Romës duhet respektuar nga të gjithë, kështuqe nuk do tolerohet asnjë sjellje që cënon dekorin e qytetit. Herës tjetër që ndodheni pranë Shatërvanit të Trevit, Shkallëve Spanjolle, Panteonit të Romës apo Koloseut, bëni kujdes të madh!

Shefi i Thesarit në Vatikan akuzohet për abuzime seksuale

Shefi i Financave të Vatikanit, kardinali George Pell, figura më e lartë katolike e Australisë, përballet në vendin e tij me një aktpadi për abuzime seksuale.

Akuzat, sipas policisë në shtetin e Viktorias, lidhen me incidente të vjetra dhe janë bërë nga më shumë se një person. Si kujdestari i Thesarit në Selinë e Shenjtë, Pell konsiderohet zyrtari i tretë më i lartë i Kishës Katolike. Ai vetëmohon me forcë çdo akuzë. Në një deklaratë të lëshuar me këtë rast nga kisha, thuhet se “kardinali do të kthehet në Australi sa më shpejt që të jetë e mundur për të pastruar emrin e tij, pasi të këshillohet e të marrë dritën jeshile të mjekëve për të udhëtuar. Ai po e pret ditën e daljes në gjyq, ku do të vetëmbrohet fuqishëm”.

Pell ka qenë për dy dekada me radhë një prej figurave më të zëshme të Kishës Katolike në debatin mbi çështje polemizuese siç është ajo e homoseksualitetit. Ai është kujdesur gjithashtu edhe për përgjigjet zyrtare që i janë dhënë pretendimeve për abuzime seksuale brenda radhëve të kësaj kishe në Australi.

Kur dëshmoi vitin e kaluar në një video-konferencë në Komisionin Mbretëror, disa prej viktimave të abuzimeve udhëtuan deri në Romë për ta dëgjuar.

Policia nuk ka dhënë detaje mbi akuzat e ngritura ndaj 76-vjeçarit, të cilat datojnë që nga koha kur ishte kryepeshkop i Melburnit dhe prift i thjeshtë në qytetin Ballarat.

Nuk do ta besoni kush e vendosi parullën “Basha ik” në selinë e PD

Mbrëmjen e 26 qershorit, në hyrje të selisë së Partisë Demokratike u shfaq një parullë e madhe ku shkruhej “Basha ik”. Ky veprim kishte për qëllim të shkaktonte reagime kundër Lulzim Bashës pas humbjes në zgjedhjet e 26 qershorit.

Dëshmitarë nga PD kanë bërë të ditur për politico.al se ajo parullë u vendos nga djali i ish-deputetes, Jozefina Topalli, Genar Topalli.

22 vjeçari është parë nga disa persona teksa vendoste banderolën dhe pasi ka bërë disa foto, është larguar i qetë nga selia blu.

Jozefina Topalli pritet të shpallë shumë shpejt kandidaturën për kryetare të PD-së, pasi zgjedhjet mbahen në fund të muajt korrik.

Gjigandi “Google” gjobitet me 2.7 Miliard $

Një tjetër gjobë rekord është vendosur nga BE, ndaj një kompanie Amerikane. Më e madhja e vendosur ndonjëherë ndaj nje kompanie Amerikane që operon në rajon.

Komisioni Europian, ka argumentuar se gjigandi i U.S, u ka mohuar të drejtën konsumatorit për një zgjedhje të ndershme të produkteve, duke i drejtuar ata në mënyrë të pandershme në drejtime të caktuara sipas interesave të Google.

“Ajo që Google ka bërë është e paligjshme sipas rregullave të antitrustit të BE”, tha Margrethe Vestager, zyrtari më i lartë i antitrustit të bllokut. “Ajo u mohoi kompanive të tjera mundësinë për të konkurruar në merita dhe për të sjellë risi. Dhe më e rëndësishmja, u mohoi konsumatorëve evropianë një zgjedhje të vërtetë të shërbimeve dhe përfitimet e plota të inovacionit”.

Google tha në një deklaratë se përpiqet të tregojë reklama në mënyra që janë të dobishme për blerësit dhe shitësit.

“Ne me respekt nuk pajtohemi me konkluzionet e shpallura sot,” tha një zëdhënës i Google. “Do të shqyrtojmë hollësisht vendimin e Komisionit ndërkohë që po konsiderijmë një apel dhe ne presim me padurim të vazhdojmë ta bëjmë gati çështjen nga ana jonë”.

Komisioni tha se Google ka vepruar në mënyrë të paligjshme duke u dhënë përparësi vendosjes në rezultatet e kërkimit, shërbimit të saj të blerjeve, ndërsa duke ulur rezultatet nga rivalët në zona ku blerësit potencialë kishin më pak gjasa të klikonin.

BE mund të gjobisë Google deri në 10% të shitjeve të saj vjetore, ose rreth 9 miliardë dollarë.
Gjobë prej 2.7 miliardë dollarësh përfaqëson pak më shumë se 2.5% të të ardhurave të Google vitin e kaluar dhe Alphabet, pronari i Google, kishte cash 92.4 miliardë dollarë në fund të muajit mars.

Vestager tha se konkurrentët e Google mund të kërkonin kompensim në gjykatat kombëtare brenda BE. Ajo tha se qindra kompani, duke përfshirë disa me bazë në SHBA, u ankuan për mënyrën se si Google shfaqi shërbimin e saj të blerjeve.
Aksionet në Alphabet kanë rënë me 1.2%.

Gjoba e së martës ja kalon dënimit të mëparshëm të antitrustit të BE-së prej 1.06 miliardë eurosh (1.2 miliardë dollarë) të vendosura ndaj Intel në 2009. Intel ka luftuar për ta përmbysur atë vendim që nga ajo kohë.

Dhimbja e kokës e Google ndaj rregullatorëve në Evropë nuk përfundon duke rikujtuar edhe  rastin e blerjeve online, që daton në 2010.

BE gjithashtu ka akuzuar titanin e Silicon Valley për abuzimin e pozitës së saj të tregut duke imponuar kufizime ndaj prodhuesve të pajisjeve Android dhe operatorëve të rrjeteve mobile.
Po heton edhe shërbimin e vendosjes së reklamës së kompanisë, AdSense.

Firmat amerikane janë nën shqyrtim më të madh në Evropë për çështjet që lidhen me tatimin dhe konkurrencën.

Apple (AAPL, Tech30) është duke luftuar një kërkesë evropiane që të paguajë 13 miliardë Euro (14.7 miliardë dollarë) në taksat të prapambetura ndaj qeverisë irlandeze.

Facebook (FB, Tech30) është gjobitur nga rregullatorët antitrust në muajin maj për mashtrim ndaj zyrtarëve mbi marrjen në pronësi të WhatsApp. Të njëjtin muaj, Amazon (AMZN, Tech30) ra dakord të ndryshoj marrëveshjet e saj të shpërndarjes me botuesit e librit për të adresuar shqetësimet antitrust të ngritura nga Komisioni.

Dhe në fillim të qershorit, zyrtarët e antitrusteve nisën hetime në pretendimet se Nike (NKE) mund të ketë shkelur ligjet e BE duke kufizuar mënyrën se si tregtarët mund të shesin mallra të licencuara. Universal Studios Comcast (CCV) po hetoet për të njëjtën arsye.

Vestager hodhi poshtë çdo sugjerim të paragjykimeve antiamerikane, duke u thënë gazetarëve të martën se një analizë e hetimeve që ka nisur departamenti i saj ka gjetur se kompanitë e SHBA nuk ishin duke u shënjestruar në mënyrë joproporcionale.

Më shumë se 8 000 migrantë të shpëtuar 48 orët e fundit

Më shumë se 8 000 migrantë u shpëtuan gjatë 48 orëve të fundit në Mesdhe, në ujërat përballë Libisë, duke përfshirë këtu 5 000 të tillë një ditë më parë, njoftuan për median rojat bregdetare.

“Të hënën kemi bërë të mundur shpëtimin e rreth 5 000 personave të cilët ndodheshin në bordin e katër anijeve, njëra më e vogël si kapacitet dhe 18 gomoneve”, deklaroi një zëdhënës i rojave bregdetare.

Ai saktësoi se një numër i konsiderueshëm anijesh të rojave bregdetare, të marinës ushtarake, pjesë përbëresë të Frontex, agjencia evropiane e kufijve, dhe OJQ-ve morën pjesë në këto operacione shpëtimi.

Disa të vdekur pas zjarrit në një ndërtesë rezidenciale

Një zjarr i madh ka përfshirë në mesnatë një ndërtesë 27 katëshe në perëndim të Londrës.

“Zjarri që përfshiu në mesnatë një ndërtesë në perëndim të Londrës ka shkaktuar disa të vdekur”, deklaroi shefja e zjarrfikseve në kryeqytetin britanik. “Ka disa të vdekur. Nuk mund të konfirmoj një shifër për shkak të përmasave dhe kompleksitetit të ndërtesës”, deklaroi Dany Cotton, zyrtar i London Fire Brigade në një deklaratë për shtyp.

“Të paktën 30 persona u plagosën”, theksuan më herët shërbimet spitalore, ndërkohë që një numër banorësh ndodhen ende brenda ndërtesës me 120 apartamente dhe 27 kate.

Më shumë se 200 zjarrfikës vazhdojnë të punojnë për shuarjen e flakëve në kullën Grenfell, në veri të Kensingtonit, ku mendohet se jetojnë qindra vetë.

Nga 15 qershori, BE i thotë lamtumirë shërbimit “Roaming”

Duke nisur nga e enjtja e 15 qershorit, Bashkimi Europian i thotë lamtumirë “Roaming”-ut. Por çfarë do të ndryshojë dhe si mund t’i evitojmë surprizat në faturat tona të telefonit? Këshillat dhe truket për të përmirësuar jetën tonë me hapat e fundit të teknologjisë janë si më poshtë.

Fundi i kostove shtesë për telefonatat, SMS-të dhe internetin. Me disa përjashtime…

Pas disa vitesh hezitimi dhe shtyrjeje, shërbimi “Roaming” për cilindo që udhëton drejt vendeve të Bashkimit Europian nuk do të ekzistojë më. Nga 15 qershori nuk do të ketë më shpenzime shtesë kur shtetasit europianë të udhëtojnë drejt 26 vendeve të BE-së, përfshi edhe disa vende të tjera.

Me pak fjalë, kjo do të thotë se planet tarifore, qoftë me kontratë apo me parapagesë, do të aplikohen kudo njësoj. Ky është një nga ato raste kur konsumatorët janë vënë në qendër të zgjedhjeve nga ligjvënësit. E kjo nuk është një zgjedhje rastësore, por vjen pikërisht përpara verës, duke evituar kështu kostot shtesë që klientët e telefonive të lëvizshme paguanin kur shkonin me pushime.

Fundi i “Roaming” bën pjesë në një strategji të quajtur “tregu i përbashkët dixhital”, që ka për objektiv shembjen e barrierave ndaj qarkullimit të lirë të informacioneve “online”. Një tjetër lajm i mirë është se në 6 muajt e ardhshëm do të hiqet edhe “bllokada gjeografike”, pikërisht ajo që të pengon të shohësh apo të dëgjosh përmbajtje “streaming”, si për shembull në “Netflix” apo “Spotify”, apo që të bësh blerje “online” në versionet, për shembull, gjermane apo franceze të “Amazon”.

Por jo gjithçka është kaq e thjeshtë. Komisioni Europian ka përgatitur një dokument me pyetje-përgjigje, për të sqaruar dyshimet më të shpeshta, për të evituar surprizat me faturat e telefonit.

Në cilat vende do të paguhet njësoj?

Plani tarifor kombëtar do të aplikohet njësoj kur një shtetas europian gjendet në Austri, Belgjikë, Bullgari, Qipro, Kroaci, Danimarkë, Estoni, Finlandë, Francë, Gjermani, Greqi, Irlandë, Itali, Letoni, Lituani, Luksemburg, Maltë, Holandë, Poloni, Portugali, Republikën Çeke, Rumani, Sllovaki, Slloveni, Spanjë, Suedi dhe Hungari.

Përveç tyre, ligjvënësit europianë kanë firmosur marrëveshje individuale edhe me disa vende jashtë BE-së, siç janë Islanda, Lihtenshtajni dhe Norvegjia. E pavarësisht “Brexit”-it, do të paguhet njësoj edhe në Mbretërinë e Bashkuar, megjithatë në këtë të fundit reduktimi i kostove mund të mos jetë përfundimtar, pasi gjithçka do të varet nga negociatat për daljen e ishullit nga blloku europian.

Jashtë këtij akordi mbeten vende që nuk janë bërë ende pjesë e BE-së, si për shembull Shqipëria, Zvicra dhe San Marino, vende në të cilat shërbimi “Roaming” do të vijojë të funksionojë. Nëse një shtetasi europian do t’i duhet të kalojë nëpër këto vende me automjete, atij mund t’i ngarkohen kosto të paparashikuara, sidomos sa i përket të trafikut të të dhënave përmes internetit, kjo sepse telefoni i atij do të vijojë të shkarkojë të dhëna edhe kur nuk është aktiv.

Tashmë nuk do të paguhet asnjë vlerë shtesë, nëse një italian telefonon në Suedi nga Roma, por edhe nëse telefonon në Francë nga Suedia.

Europianëve, SMS nga operatorët më 15 qershor

Më 15 qershor, shtetasit e BE-së do të njoftohen përmes mesazheve të shkurtra për fundin e kostove shtesë dhe nëse do të ketë modifikime të planeve të tyre tarifore. Kjo, sepse brenda për brenda BE-së atyre nuk do t’iu ndryshojë gjë, por nëse kanë në plan të udhëtojnë drejt SHBA, atëherë opsionet u nevojiten për të qenë të informuar. Operatorët, gjithsesi do të jenë të detyruar t’i njoftojnë klientët e tyre kur largohen nga territori kombëtar, pavarësisht se nuk iu ndryshojnë tarifat.

Si do të përdoret interneti kur të udhëtojnë jashtë, por brenda BE-së?

Gjëja e parë që europianëve do t’u duhet të bëjnë me të mbërritur në shtetin destinacion, është aktivizimi i të dhënave “roaming”. Kjo sepse për momentin nuk ka ende një marrëveshje mes të gjithë operatorëve për të mundësuar internet në mënyrë automatike. Megjithatë, edhe në këtë rast nuk do të kenë kosto shtesë. Gjithsesi, nëse dikush ka opsionin 4G në planin kombëtar, nuk është e thënë që ta ketë të garantuar edhe në vendin ku ka shkuar për pushime.

Rregullorja kundër abuzimeve

Ata që konsiderohen si më dinakët nuk do të mund të përfitojnë nga mbyllja e shërbimit “Roaming”, që do të thotë se nuk do të jetë e mundur të blihet një kartë “SIM” në një vend me kosto jetese më të ulët dhe të banojnë në një tjetër shtet europian. Çdo 4 muaj, operatorët do të jenë të detyruar të kontrollojnë se nga vjen pjesa më e madhe e trafikut. Nëse më shumë se 50% +1 e telefonatave, SMS-ve apo “megabyte”-ëve do të shihen se janë nga një shtet tjetër nga ai rezidencial, do të aplikohen tarifat “Roaming”. Operatori mund të bëjë edhe kontrolle të tjera, si për shembull atë të kartës së identitetit. Është zgjedhur kjo periudhë 4-mujore, sepse shihet si e mjaftueshme që të shkosh me pushime e të ndjekësh kurset e trajnimit jashtë, pa pasur nevojë për të blerë një kartë të dytë “SIM”. Një lajm i mirë është edhe për ata që konsiderohen “kufitarë”, apo ata që udhëtojnë çdo ditë. Nëse brenda harkut prej 24 orësh do të rilidhen me rrjetin e vendit amë, e gjithë dita do të përllogaritet si trafik kombëtar.

E mitura shpëtohet nga “Balena Blu”

Një 12-vjeçare nga rrethinat e Gjirokastrës i ka shpëtuar aktit final të lojës “Balena blu”, që shtyn adoleshentët drejt vetëvrasjes, falë vëmendjes së shokëve të klasës.

Ata kishin vënë re ndryshimet e saj në gjendje emocionale dhe sjellje deri edhe shenjat e vetëplagosjes.Vajza ishte në ditën e 33-të të lojës që zgjat 50 ditë. Ajo kishte 10 ditë pa ushqim . Vajza përdorte telefonin e një shoqeje dhe udhëzimet i merrte në pushimin e gjatë.

Sipas burimeve nga Drejtoria Arsimore Rajonale Gjirokastër, prindërit e vajzës nuk e kanë pikasur pasi vuajnë nga probleme psikologjike. Me vajzën po kujdesen psikologët, ndërsa është bërë edhe denoncimi pranë Zyrës së Krimit Kibernetik.

“Fëmija kishte arritur deri aty sa lëndonte veten, kishte ditë pa ngrënë dhe pa pirë, një pjesë e udhëzimet të kësaj loje është edhe kjo. Një vajzë, të cilës i di vetëm emrin, i ka ofruar telefonin e saj dhe merrte udhëzime në pushimin e gjatë”, thotë Drejtorja e Drejtorisë Arsimore të Gjirokastrës, Lindita Rova.

Por rreziku i kësaj loje është i pranishëm në çdo familje dhe grupmoshë pavarësisht gjendjes së tyre sociale dhe ekonomike.

“Fëmijët mund ta shkarkojnë vetë lojën në aparatet e tyre celularë. Në të gjitha rastet, prindërit duhet të jenë të kujdesshëm ndaj ndryshimeve që pësojnë fëmijët. Nëse bëhet më agresiv, nuk ju dëgjon, nuk ha, refuzon të pijë lëngje, nëse vëreni të grisura dhe të gërvishtura në trup, duhet të dyshoni tek loja “Balena Blu”, thotë Rova.

Loja është përhapur si fillim nga Rusia, ku ka shkaktuar dhjetëra viktima dhe në vendet fqinjë me Shqipërinë alarmi është dhënë prej disa muajsh. Fëmijët bien pre e lojës duke u kontaktuar si fillim në rrjetet sociale, kryesisht Facebook e më pas u nënshtrohen rregullave 50-ditore të administratorëve anonimë.

Rregullat konsistojnë në një kalendar detyrash si shëtitja natën dhe zgjimi çdo ditë në orën 04:20 të mëngjesit, shikimi i filmave horror e deri në vetëplagosje me sende të mprehta.

Në Rusi besohet se pas këtij rrjeti qëndrojnë disa të rinj të diplomuar në psikologji.

Sulmi në “Notre-Dame”, identifikohet agresori. Student doktorature

Agresori 40-vjeçar, që sulmoi me çekiç efektivët e policisë përpara Katedrales “Notre-Dame” në Paris, është identifikuar si Farid Ikken, me origjinë algjeriane, i cili vazhdonte studimet e doktoraturës për Shkenca Sociale në Universitetin e Lorraine (Lorenës).

“Me vete ai kishte edhe dy thika, – shpjegojnë forcat e rendit, që theksojnë gjithashtu se – agresori është qëlluar në të dy këmbët, e jo në gjoks siç u raportua më parë”.

I martuar me një suedeze, ai jetonte në veri të kryeqytetit francez. Në banesën e sulmuesit, policia thuhet të ketë gjetur një video, ku Ikken betohej për besnikëri ndaj Shtetit Islamik, e ku tregohej edhe qëllimi i kryerjes së atentatit.

Përpara se të godiste policin, 40-vjeçari ka thirrur me të madhe: Kjo është për Sirinë!

Deri tani, megjithatë, asnjë grup xhihadist nuk e ka marrë përsipër përgjegjësinë e incidentit. Episodi ngjalli panik mes njerëzve në zonë.

“Kishte shumë njerëz në shesh. Nuk mund t’iua them numrin e saktë, por ishte plot. Ishte e frikshme ta shikoje atë skenë. U trembëm të gjithë dhe nisëm të vraponim”, tha një kalimtar.

Franca është tronditur prej gati dy vitesh e gjysmë nga një seri e pashembullt sulmesh terroriste, prej të cilave kanë gjetur vdekjen në total gati 240 vetë, e jo rrallëherë shënjestra kanë qenë forcat e rendit. Në mesin e muajit prill, një polic u vra nga një atentator në mesin e shëtitores së famshme “Champs-Élysées”.

Advertisement

EDITOR PICKS